वादोरियो नेतृत्वमा हरिशरण

नेपाल वादोरियो कराते डो संघको दोश्रो चुनावी साधारणसभाले हरिशरण केसीको अध्यक्षतामा १९ सदस्यीय केन्द्रीय कार्यसमिति बिहीबार निर्विरोध चयन गरेको छ । २०६४ सालमा राष्ट्रिय खेलकुद परिषद् (राखेप) मा वादोरियो संघ दर्ता हुँदा केसी सदस्य थिए । अघिल्लो कार्यसमितिका उपाध्यक्ष केसी वादोरियोका प्रमुख प्रशिक्षक हुन् ।
नेपाल कराते महासंघका महासचिव समेत रहेका केसीले निर्विरोध निर्वाचित भएपछि आफूलाई सुम्पिएको जिम्मेवारी इमानदारी पूर्वक निर्वाह गर्ने बताउदै सबैसंग हातेमालो गरी करातेको विकास र विस्तारमा लाग्ने प्रतिबद्धता जनाए ।
नवनिर्वाचित कार्यसमितको वरिष्ठ उपाध्यक्षमा तेजेन्द्र गुरुङ तथा उपाध्यक्षमा यादवलाल श्रेष्ठ, ईश्वर लामा, चित्रबहादुर केसी र छत्रबहादुर बस्नेत रहेका छन् । सन्ध्या थापाले महासचिव, सन्तोष मल्लले सचिव तथा सूर्यबहादुर राईले कोषाध्यक्षको जिम्मेवारी पाए ।
शिवराम अधिकारी, सिमोन खत्री, जितबहादुर कार्की, राजेश श्रेष्ठ, मनोज केसी, दिनेशकुमार आचार्य, मनोजकुमार जिसी, विष्णुप्रसाद खनाल, कृष्णबहादुर कुँवर तथा रत्नबहादुर महर्जन सदस्यमा चयन भए ।
नवनिर्वाचित पदाधिकारीहरुलाई राखेपअन्तर्गत संघ संस्था समन्वय शाखाका प्रमुख एवं प्रमुख निर्वाचन अधिकृत डेमबहादुर बस्नेतले पद तथा गोपनीयताको शपथ गराउनुका साथै प्रमाण पत्र प्रदान गरे । त्यसअघि साधारणसभाको पूर्व मन्त्री एवं माओवादी केन्द्रका सदस्य देव गुरुङले उद्घाटन गरेका थिए ।
बसुन्धारास्थित यति पार्टी प्यालेसमा भएको साधारणसभामा केन्द्रका १९, विभिन्न ३० जिल्लाबाट एकका दरले ३०, प्रशिक्षक र प्राविधिकबाट १–१ तथा अन्तर्राष्ट्रिय खेलाडी २ गरी जम्मा ५३ प्रतिनिधिको उपस्थिति रहेको निर्वाचन अधिकृत एवं संघ संस्था समन्वय शाखाका प्रशासकीय अधिकृत ओम न्यौपानेले जनाएका छन् ।


Leave a Reply

Your email address will not be published. Required fields are marked *