राष्ट्रपतिद्वारा पारा साइकल यात्रीको बिदाइ

साइकल यात्रामार्फत विश्वको विभिन्न ५० राष्ट्र पुगिसकेका पारा साइकल यात्री कालिकाप्रसाद भण्डारीको अर्को यात्राका लागि राष्ट्रपति विद्यादेवी भण्डारीले बुधबार एक कार्यक्रमबीच बिदाइ गरिन् । महाराजगन्जस्थित शितल निवासमा राष्ट्रपति भण्डारीले कालिकालाई सफलताको शुभकामनासहित राष्ट्रिय झण्डा हस्तान्तरण गरी बिदाइ गरिन् ।
कालिाका पुनः आफ्नो साइकल यात्रा अमेरिकाको टेक्सास्बाट सुरु गर्दैछन् । त्यसका लागि उनी दशैंको टीकाको दिन अमेरिका प्रस्थान गर्दैछन् । प्रारम्भमा उनले यात्रा सुरु गर्दा विदेशीभूमिका रुपमा पहिलो पटक भारत पुगेका थिए । त्यसपछि विभिन्न राष्ट्र हुँदै ५० राष्ट्र यात्रा गर्ने क्रममा उनले अमेरिकाको टेक्सास्मा पहिलो चरणको यात्रालाई पूर्णविराम लगाएका थिए । अब उनले पुनः टेक्सास्बाट यात्रा प्रारम्भ गर्ने छन् । टेक्सास्बाट उनी मेक्सिोतर्फ लाग्ने छन् । मेक्सिको हुँदै विभिन्न १७ राष्ट्रको यात्रा गरिसकेपछि अन्तार्तिका पुगेर यात्रा समाप्त गर्ने लक्ष्य उनको छ ।
५० राष्ट्रको यात्रा गर्दा १३ हजार किलोमिटर दूरी तय गरेको कालिकाले बताए । त्यसक्रममा करिब ३ करोड रुपैयाँ खर्च भइसकेको उनको दाबी छ । नेपाली साथीभाइ, एनआरएन, अपाङका संघ संस्थालगायतबाट खर्चको जोहो गरेको उनले जानकारी गराए । अबको यात्रामा करिब २२ लाख खर्च हुने उनको अनुमान छ ।
तनहुँको पर्कोट गाविस ९ निवासी ४९ वर्षिय कालिका ८ वर्षको छँदा खेल्ने क्रममा देब्रे खुट्टामा चोट लागेको थियो । घरेलु पारा खेलकुदमा सहभागिता जनाइसकेका कालिका नेपाल पारा ओलम्पिक कमिटीका संस्थापक कोषाध्यक्ष तथा राष्ट्रिय अपाङ्ग महासंघको पनि कोषाध्यक्ष थिए । ‘अपाङ्ग अधिकार तथा विश्व शान्ति’ उद्देश्यसाथ यात्रा थालेका कालिकाले २०१० बाट साइकल यात्रा सुरु गरेका हुन् ।
बिदाइ कार्यक्रममा राष्ट्रपति भण्डारीले कालिकाको यात्राको विविध पक्ष बारे रुचीपूर्वक जानकारी लिएकी थिइन् । बिदाइका अवसरमा पारा ओलम्पिक कमिटीका अध्यक्ष दीपक कोइराला, महासचिव कुमार पौडेल र कोषाध्यक्ष ढुण्डिराज चालिसे उपस्थित थिए ।


Leave a Reply

Your email address will not be published. Required fields are marked *